Srivari Weekly Seva Varotsavalu | ॐ Welcome to TirumalaHills - Dharmo Rakshati Rakshita

Showing posts with label Srivari Weekly Seva Varotsavalu. Show all posts

<a href="https://blogger.googleusercontent.com/img/b/R29vZ2xl/AVvXsEi104uOYaS7F_fYh4pqzNhuhD7KPFKJYUkPes-4TT51Xv3SkaYVIsaBEp8BBk9dLnGvpto4FgBFvoFCuOxyIhvvjN7n3BwwcsX_qdr8O3TKmWq-V8bi_isGcw5tyOyBGSuPM6UU09bkyFka795K6LcbRSQ4AZotVfICeCNw94qkkJp3O733g3ArBls/s1350/280644965_550822643064855_1154483024830820149_n.jpg" style="margin-left: 1em; margin-right: 1em; text-align: center;"><img border="0" data-original-height="1350" data-original-width="1080" src="https://blogger.googleusercontent.com/img/b/R29vZ2xl/AVvXsEi104uOYaS7F_fYh4pqzNhuhD7KPFKJYUkPes-4TT51Xv3SkaYVIsaBEp8BBk9dLnGvpto4FgBFvoFCuOxyIhvvjN7n3BwwcsX_qdr8O3TKmWq-V8bi_isGcw5tyOyBGSuPM6UU09bkyFka795K6LcbRSQ4AZotVfICeCNw94qkkJp3O733g3ArBls/s16000/280644965_550822643064855_1154483024830820149_n.jpg" /></a> <h1>🙏 శ్రీవారి వారోత్సవాలు-1 🙏</h1> 💫 “ఎన్ని జన్మల పుణ్యమో - నీకిన్ని సేవలు చేయగా! ఏడుకొండల దేవరా – ఈ భాగ్యమంతా మాదిరా!” 💫 తిరుమల లోని శ్రీవారి ఆలయం, లెక్కకు మిక్కిలి ఉత్సవాలు, సేవలతో వైకుంఠాన్ని తలపిస్తుంది. ఈ సేవలను ఆచరించే వారు యజ్ఞఫలాన్ని పొందుతారని భక్తుల విశ్వాసం. ఉత్సవప్రియుడైన స్వామి సేవలలో ఉన్న పరమార్థాన్ని వేయి నోర్లు, రెండువేల నాలుకలు కల ఆదిశేషుడు, ఆయన నాభికమలంలో ఉద్భవించిన బ్రహ్మ, వక్షోవిహారిణి అయిన అమ్మవారు కూడా చెప్పలేక సతమతమయ్యారట. అంతటి మహత్తరమైన సేవలను వర్ణించటానికి మనమెంతటి వారం? అయినా, ఆ స్వామి వారి మీద భారం ఆ సేవల సారాంశాన్ని లేశమాత్రంగా తలుచుకుందాం. 💫 సుప్రభాతసేవ నుంచి ఏకాంతసేవ వరకూ ప్రతిరోజూ జరిగే "నిత్యసేవలను" మనం ముందే చెప్పుకున్నాం. ఇక వారంలో ఒక రోజు మాత్రం జరిగే "వారోత్సవాల" గురించి తెలుసు కుందాం. 💫 శ్రీవారి పాదపద్మాలకు జరిగే అష్టదళపాద పద్మారాధన తో "వారోత్సవాలు" వాటి విశేషాలను తెలుసుకుందాం. 🙏 అష్టదళ పాద పద్మారాధన 🙏 💫 ప్రతి మంగళవారం, ఉదయం ఆరు గంటలకు, రెండవ అర్చనగా, నూట ఎనిమిది బంగారు కమలాలతో మూలవిరాట్టు పాద పద్మాలకు, సుమారు 20 నిముషాల పాటు జరిగే సేవా కార్యక్రమమే ఈ అష్టదళ పాద పద్మారాధన. ప్రతిరోజూ, స్వామివారి పాదాలకు తులసిదళాలతో ఏకాంతంగా అర్చన జరుగుతుంది. కైంకర్యపరులకు తప్ప వేరెవరికీ అది చూసి తరించే భాగ్యం లేదు. కానీ మంగళవారం మాత్రం "అష్టదళ పాద పద్మారాధన" ఆర్జిత సేవలో పాలు పంచుకొనే భక్తులందరూ ఈ అర్చనను చూసి తరించవచ్చు. 🙏 ముస్లిం భక్తుడు? 🙏 💫 1984 సం. లో, తి.తి.దే. స్వర్ణోత్సవాల సందర్భంగా ఈ సేవ ప్రారంభించబడింది. హైదరాబాదు, గుంటూరు వాస్తవ్యుడైన ఓ మహమ్మదీయ భక్తుడు ఇందుకు అవసరమైన 108 బంగారు పద్మాలను శ్రీవారికి కానుకగా సమర్పించాడు. స్వామివారు ఒక మతానికో, ప్రాంతానికో పరిమితం కాని అఖిలాండ, బ్రహ్మాండ నాయకుడనటానికి ఇంతకంటే చక్కటి నిదర్శనం ఏం ఉంటుంది? 💫 కొంతకాలం తరువాత ఇది ఆర్జిత సేవగా రూపు దిద్దుకుంది. అయితే, అన్ని ఇతర సేవా కైంకర్యాల లాగా ఈ అర్చన యొక్క మూలాలు కూడా ప్రాచీన కాలం నాటి ఆగమశాస్త్రం లోనే ఉన్నాయి. 🌈 ఈ సేవ, ఎప్పుడు - ఎలా ప్రారంభమైంది! 🌈 💫 దీని విషయమై ఒక ఆసక్తికరమైన, అద్భుతమైన, ఈ మధ్యకాలంలోనే జరిగిన యదార్థ సంఘటన ఉంది. 💫 1982వ సంవత్సరంలో తి.తి.దే. బోర్డు సమావేశం జరుగుతున్నప్పుడు, షేక్ మస్తాన్ అనే ముస్లిం భక్తుడు అప్పటి ఎగ్జిక్యూటివ్ ఆఫీసర్ పి వి ఆర్ కే ప్రసాద్ గారిని కలుసుకునే నిమిత్తం తి.తి.దే. కార్యాలయానికి వచ్చారు. సమావేశంలో వ్యస్తుడై వుండటంవల్ల శ్రీ ప్రసాద్ గారు అఇష్టంగానే ఆ భక్తుణ్ణి కలుసుకున్నారు. ఆ భక్తుని కథనం ఇలా ఉంది - 💫 "అయ్యా! గుంటూరు జిల్లాకు చెందిన మా అన్నదమ్ముల మందరం ఉమ్మడి కుటుంబంలో కలసి మెలసి ఉంటూ ఓ చిన్నపాటి వ్యాపారం చేసుకుంటున్నాం. మాది ఓ మధ్యతరగతి కుటుంబం. తరతరాలుగా మేము శ్రీవారి భక్తులం. మా గృహంలో శ్రీవెంకటేశ్వర సుప్రభాతం, మంగళాశాసనం, శ్రీవేంకటేశ్వరగద్యం వీటి పఠనం నిత్యం జరుగుతుంది. ప్రతి మంగళవారం నాడు అష్టోత్తర శతనామార్చన కూడా భక్తితో జరుపబడుతుంది. మా తాతగారు, తన స్వార్జితంతో 108 స్వర్ణపుష్పాలు చేయించి శ్రీవారికి సమర్పిస్తానని మొక్కుకున్నారు. కానీ కొన్ని పద్మాలు చేయించగానే అస్వస్థతతో కాలం చేశారు. దాంతో ఆ మ్రొక్కు తీర్చుకునే బాధ్యత మా తండ్రిగారు భుజానికెత్తుకుని, మరికొన్ని పుష్పాలు చేయించి, వారు కూడా స్వర్గస్తులయ్యారు. ఇప్పుడా బాధ్యత మా మూడోతరం వారిపై పడింది. ఆ బాధ్యతను ఆనందంగా స్వీకరించి, ఆర్థికంగా అంతంత మాత్రమే స్థోమత గల మేమందరం ఎన్నో వ్యయప్రయాసల కోర్చి, ప్రతి పైసా కూడబెట్టి, ఎన్నో ఏళ్లుగా స్వర్ణకమలాలు తయారు చేయిస్తున్నాము. ఒక్కొక్కటి 23 గ్రాముల బరువు గల 108 కమలాలు ఈ మధ్యనే పూర్తయ్యాయి. తమరు దయతో వీటిని స్వీకరించి స్వామివారి కైంకర్యంలో ఏదోవిధంగా వినియోగిస్తే, మన తండ్రి, తాత గార్ల ఆత్మలు శాంతిస్తాయి. మా కుటుంబ సభ్యులందరికీ ఎనలేని ఆనందం చేకూర్చిన వారవుతారు. ఈ విషయం తమతో ప్రత్యక్షంగా విన్నవించు కోవడానికి, 54 మంది సభ్యులు గల మా పరివారమంతా, కాలినడకన బయలు దేరి కొండకు చేరుకున్నాం." 💫‌ ఆ మహమ్మదీయ భక్తుడి ఆవేదనను, ఆర్తిని ఆసాంతం విన్న బోర్డు సభ్యులకు నోటమాట రాలేదు. మరో రెండేళ్ల తర్వాత జరుగబోయే తి.తి.దే. స్వర్ణోత్సవాలు చిరకాలం గుర్తుండిపోయే విధంగా ఏ సేవను ప్రవేశపెట్టాలా! అని తర్జనభర్జన పడుతున్న బోర్డు సభ్యులకు ముస్లిం భక్తుని విన్నపం, వెదకబోయిన తీగ, శ్రీవారి కృపతో కాలికి తగిలినట్ల నిపించింది. అంతే! బోర్డు సమావేశంలో ఏకగ్రీవంగా తీర్మానించి, 1984 సంవత్సరంలో జరిగిన స్వర్ణోత్సవాల సందర్భంగా "అష్టదళ పాద పద్మారాధన" అనబడే, ప్రతి మంగళవారం జరిగే, నయనా నందకరమైన ఆర్జిత సేవను ప్రవేశపెట్టారు. అప్పటినుండి ఈ సేవ నిరాటంకంగా జరుప బడుతోంది. 🙏 పద్మారాధన మహత్యం 🙏 💫 పురాణేతిహాసాల్లో ఉటంకించిన దాని ప్రకారం, గర్భాలయంలో మూలవిరాట్టుకు జరిగే ఈ సేవ అత్యంత మహత్తరమైనది. మన మనస్సనే పద్మాన్ని స్వామివారి పాదపద్మాలకు సమర్పిస్తున్నామనే భావం భక్తులను పరవశింపజేస్తుంది. స్వామివారి పాదాలు, హస్తద్వయం, ముఖము, నేత్రాలు, పద్మంలో ఉన్నటువంటి వక్షస్థల లక్ష్మీ అమ్మవారు సమస్తం పద్మమయమే! వేంకటేశుని ఆ పద్మతత్వం మనలను ధర్మమార్గం వైపు నడిపిస్తుంది. కాబట్టే, ఈ పద్మారాధనకు అంతటి ప్రాముఖ్యం ఉంది. 🌈 ఆరాధనా విధానం 🌈 💫‌ ఉదయం 6 గం. లకు, వైఖానస అర్చకులు గర్భాలయ మూర్తికి ఆర్ఘ్య, పాద్య, ఆచమనాదులు నిర్వహించడంతో ఈ సేవ మొదలవుతుంది. తరువాత, "శ్రీవేంకటేశాయనమః" అనే ఉచ్ఛారణతో ప్రారంభమైన అష్టోత్తర శతనామావళి పఠనంతో బాటుగా, శ్రీవారి పాదాలకు, ఒక్కో నామానికి ఒక్కో స్వర్ణపద్మ సమర్పణతో అర్చన కొనసాగుతుంది. శ్రీవారి పాదాల ముందుంచిన ఓ ఐదంచెల వర్తులాకార పీఠంపై ఈ పద్మాలను ఒకటొకటిగా ఉంచుతారు. ఈ 108 నామాలలో శ్రీవారి ఘనతనూ, దివ్యచరితనూ, లీలలనూ, పరాక్రమాన్నీ, అవతార విశేషాలను కొనియాడతారు. 🌈 ఐతిహ్యం 🌈 💫‌ పూర్వయుగాల్లో బ్రహ్మదేవుడు సమస్త దేవగణ సమేతుడై, స్వర్గంలో ప్రవహించే మందాకిని అనబడే గంగానదిలో వికసించే బంగారు పద్మాలతో, స్వామి వారి పాదాలకు అర్చన చేసినట్లు పురాణాల ద్వారా తెలుస్తోంది. బ్రహ్మ స్వయంగా విష్ణువు కుమారుడు. అంటే, ఇది కొడుకు తండ్రికి చేసేటటువంటి పాదపూజ. నాడు బ్రహ్మదేవుడు శ్రీకారం చుట్టిన ఈ సేవ నేటికీ తిరుమలలో అంగరంగ వైభవంగా జరుగుతోంది. ప్రాతఃసంధ్యలో, తల్లి తండ్రుల పాద సేవనంతో దినచర్య ప్రారంభించాలని సాక్షాత్తూ బ్రహ్మదేవుడే స్వయంగా ఆచరణలో చూపించి, యుగ-యుగాలలో తన సంతతి కంతటికీ మార్గదర్శకు డయ్యాడు. 💫‌ ఈ సేవలో పాల్గొన్న భక్తులందరికీ, శ్రీవారి కటాక్షంతో, అప్లైశ్వర్యాలు చేకూరడంతో బాటు, వంశాభివృద్ధి కలుగును 🙏 సహస్రకలశాభిషేకం 🙏 💫 సప్తగిరి సార్వభౌముని సహస్రకలశాభిషేకం! బుధవార మహోత్సవం - భువన-భూమి వైభవం! 💫 ప్రతి బుధవారం ఉదయం 6 గం. లకు బంగారువాకిలి ముందు ఘంటామండపం లో జరిగే ప్రధాన సేవే సహస్రకలశాభిషేకం. 1511వ సం. కు పూర్వం నుంచే ఈ సేవ జరగుతూ ఉన్నట్లు చారిత్రకాధారాలున్నాయి. 💫 సాధారణంగా, భోగశ్రీనివాసుని అర్చారూపం మూలవిరాట్టు పాదాల వద్ద, కొద్దిగా ఈశాన్యం వైపు తిరిగి ఉంటుంది. స్థానాన్ని "జీవస్థానం" అంటారు (తాత ముత్తాతల నుండి ఉంటున్న స్థానమే జీవస్థానం). ఆ స్థానం లోని భోగశ్రీనివాసుణ్ణి గర్భాలయం నుంచి బయటకు తెచ్చి ఓ చూడ చక్కనైన వేదికపై తూర్పు ముఖంగా వేంచేపు చేస్తారు. మరోప్రక్క ఉత్తరదిక్కుగా, శ్రీదేవి భూదేవీ సహిత మలయప్పస్వామిని వేరొక వేదిక మీద వేంచేపు చేస్తారు. దక్షిణదిశగా, ఆంటే మలయప్పస్వామి వారికి అభిముఖంగా ఉండేట్లు విష్వక్సేనుల వారిని నెలయింప చేస్తారు. ఇలా, మూడు మూర్తులూ అర్థవృత్తాకారంలో, కన్నుల పండువగా సమావేశం అయ్యేటటువంటి అద్భుత ఘట్టం మనకు సహస్రకలశాభిషేక సందర్భంగా గోచరిస్తుంది. 💫 మరో ప్రక్క, ధాన్యపు గింజలతో ఒత్తుగా పరచబడిన పాన్పుపై 1008 వెండి చెంబులను పేర్చి, వాటిని సుగంధద్రవ్యాలు కలిపిన పవిత్ర జలాలతో నింపి, నాలుగు మూలలా వస్త్రంతో కప్పి, వాటిని మంత్ర పూర్వకంగా ఆవాహన చేస్తారు. మంగళకరంగా ఉండేందుకు గానూ, వీటిపై మామిడాకులు కూడా ఉంచుతారు. 👉 ✅‌ ఇక్కడో రహస్యం ఉంది! 💫 భోగశ్రీనివాసుడుకి స్నానం చేయిస్తూంటే, ఆ కైంకర్యాలన్నీ గర్భగుడిలో ఉండే వేంకటేశ్వరస్వామి కెలా చేరుతాయి? మూలవిరాట్టుకు అంత శక్తి ఎలా వస్తుంది? గర్భగుడి లోని మూలమూర్తికి ఏ రోజూ 1008 కలశాలతో అభిషేకం జరగట్లేదు కదా? వందల, వేల సంవత్సరాల తరబడి, అనేకానేక భక్తులు శాస్త్రానుసారం, చిత్తశుద్ధితో చేసే సేవల వల్లే దేవతా మూర్తులకు వర్ఛస్సు, తేజస్సు, శక్తి సమకూరుతాయని వైదిక గ్రంథాల్లో చెప్పబడింది. 💫 సహస్రకలశాభిషేకం వల్ల ఉత్సవమూర్తులకు చేకూరే శక్తిని మూలమూర్తికి చేర్చడం కోసం, భోగశ్రీనివాసుణ్ణి మరియు గర్భగుళ్ళోని మూలవిరాట్టును కలుపుతూ ఓ పట్టు దారం కడతారు. దీన్ని అనుసంధాన తోరణం అంటారు. అభిషేకం జరుగుతున్నప్పుడు, ఈ 1008 కలశాల్లో ఉన్నటువంటి అభిషేకజలం యొక్క పవిత్రశక్తి ఈ పట్టుదారం ద్వారా గర్భగుడిలో ఉన్న స్వామివారిలో మమేకమౌతుంది. అప్పుడు శ్రీవారు మరింత శక్తిమంతులై, భక్తులను సంరక్షిస్తూ ఉంటారు. 💫 మనం కూడా ఏవైనా పూజా కార్యక్రమాలు చేసేటప్పుడు ముంజేతికి కంకణం కట్టుకుంటాం. దీని వల్ల కంకణధారులకు అంతులేని అదృశ్యశక్తి లభిస్తుందని భక్తుల విశ్వాసం. 💫 దీనికి ముందుగానే, అర్చామూర్తులను ఉంచే ప్రదేశానికి స్థలశుద్ధి చేసి, మలయప్పస్వామి మరియు ఇద్దరమ్మవార్లకు కంకణధారణ గావిస్తారు. తరువాత విష్వక్సేన పూజ, పుణ్యాహవచనం జరుగుతుంది. విష్వక్సేనుడు శ్రీవారి సేనాపతి కావున, ముందుగా ఆయన్ను పూజించే సంప్రదాయం ఉంది. అగ్నిప్రతిష్ఠ చేసి, హోమకార్యక్రమా నంతరం, 1008 రజత కలశాల జలంతో ఉత్సవమూర్తులకు అభిషేకం చేస్తారు. పురుషసూక్తంతో ప్రారంభమై, స్వామివారికి - పాలు, పెరుగు, తేనె, చందనం, పసుపు - ఈ అయిదు ద్రవ్యాలతో, విడి విడిగా అభిషేకం చేస్తారు. ప్రతి ద్రవ్యంతో అభిషేకం జరిగిన తరువాత, మూర్తులు శుభ్రపడం కోసం వాటిని మంచినీటితో స్నాన మాచరింప జేస్తారు. లేత కొబ్బరి నీళ్ళతో కూడా అభిషేకం చేస్తారు. 💫 చివరగా, సహస్రధార పాత్ర, అంటే వెయ్యి రంధ్రాలు గల వెండి పాత్ర (వెండి జల్లెడగా చెప్పుకోవచ్చు) మీదుగా, శంఖధార, చక్రధారలుగా చెప్పబడే ప్రత్యేక పాత్రల ద్వారా జలాభిషేకం జరిపించడంతో, సహస్రకలశాభిషేకం పూర్తవుతుంది. అభిషేక జలం వెయ్యి ధారలతో, స్వామివారి మీద జడివానలా కురుస్తుంటే, చూపరులకు బహుచక్కనైన దృశ్యకావ్యం ఆవిష్కార మవుతుంది. సేవ చివరిగా, పాల్గొన్న భక్తులందరి మీదా అభిషేక జలాన్ని ప్రోక్షిస్తారు. ఈ ఆర్జిత సేవ సమాప్తమవగానే, భక్తులందరినీ శ్రీవారి దర్శనానికి అనుమతిస్తారు. 💫 ఈ ఆభిషేకం ద్వారా, తేజస్సు, ఓజస్సు, జ్ఞానము, వైరాగ్యం, మేధస్సు లభిస్తాయి. ఇంకా, సకల తీర్థ జలాలతో 💫‌స్వామివారికి జరిగే అభిషేకం కనులారా దర్శించటం ద్వారా, భక్తులకు పుణ్యనదులు కలిసేటటువంటి సాగరంలో పవిత్రస్నాన మాచరించిన పుణ్యం కూడా కలుగుతుందని ప్రతీతి. 🙏 సర్వేజనాః సుఖినోభవంతు! 🙏

<div class="separator" style="clear: both; text-align: center;"><a href="https://blogger.googleusercontent.com/img/b/R29vZ2xl/AVvXsEiJs9x0iyNQFUlEfwMejriDWAc41NOWucCtkWnb0Mw5LqahLLH-dTDcNLaQRv9p0ZZ9R7BqF-Wx6tyu1dotUpmeowsFG3nOx64RVUDbb_7NLsSsLsARb32Vau10LXR--c5J_vy1rcAVR4lWdEKflAxDA7KIyj8yNVJMmUU5-JUZyFvtPvdG89q2Fpk/s2048/287691989_4916711158440923_859467089099023619_n.jpg" style="margin-left: 1em; margin-right: 1em;"><img border="0" data-original-height="2048" data-original-width="1150" src="https://blogger.googleusercontent.com/img/b/R29vZ2xl/AVvXsEiJs9x0iyNQFUlEfwMejriDWAc41NOWucCtkWnb0Mw5LqahLLH-dTDcNLaQRv9p0ZZ9R7BqF-Wx6tyu1dotUpmeowsFG3nOx64RVUDbb_7NLsSsLsARb32Vau10LXR--c5J_vy1rcAVR4lWdEKflAxDA7KIyj8yNVJMmUU5-JUZyFvtPvdG89q2Fpk/s16000/287691989_4916711158440923_859467089099023619_n.jpg" /></a></div> <h1>🙏 శ్రీవారి వారోత్సవాలు-2 🙏</h1> 🙏 గురువారపు సేవలు – తిరుప్పావడ లేదా అన్నకూటోత్సవం 🙏 "గురువార-గురుతర సేవా మహిమా వర్ణింపగ మా తరమా! పరమాత్మా... తిరువేంకట శిఖర పరంధామా!" 💫 ప్రతి గురువారం స్వామి వారికి రెండవ అర్చనానంతరం, ఉదయం 6 గం. లకు జరిగే నివేదనను తిరుప్పావడసేవ లేదా అన్నకూటోత్సవం అంటారు. సాధారణంగా మనం ఇంట్లో, మహా అయితే 1-2 కిలోలు, అదే దేవాలయాల్లో, రామనవమి, వినాయక చవితి ఉత్సవాల్లో 10-15 కిలోల పులిహోర వండుకుంటాం. కానీ, గురువారం జరిగే తిరుప్పావడ లేక అన్నకూటోత్సవ సేవలో, బళ్ళ కొద్దీ, వందలాది కిలోల పులిహోర కలిపి, స్వామి నైవేద్యానంతరం భక్తులకు ప్రసాదవితరణ చేస్తారు. 💫 గురువారం ప్రాతఃకాల ఆరాధన పూర్తి కాగానే, అర్చకస్వాములు ఏకాంతంగా శ్రీవారికి అలంకరించిన స్వర్ణాభరణాలు, పీతాంబరాల నన్నింటినీ సడలింపు చేస్తారు. తరువాత ఊర్ధ్వపుండ్రాన్ని (తిరునామాన్ని) సగానికి తగ్గించి, స్వామి వారి నేత్రాలు స్పష్టంగా, నయనానంద కరంగా కనపడేట్లు చేస్తారు. ఆభరణాలు లేకుండా స్వామి వారి దివ్యమంగళకరమైన, రూపాన్ని రోజల్లా చూడగలిగే భాగ్యం కేవలం గురువారం నాడు మాత్రమే కలుగుతుంది. 💫 అనంతరం, పండితులు వేదపారాయణతో పాటు శ్రీనివాసగద్యం పఠిస్తుండగా, ఈ "అన్న" నివేదన జరుగుతుంది. 💫 బంగారువాకిలి ముందు గరడాళ్వార్ సన్నిధిలో ఉన్న నాలుగు స్తంభాల మధ్య 484 కిలోల బియ్యంతో తయారు చేసిన పులిహోర రాశిని, ప్రత్యేకంగా తయారు చేయబడ్డ ఓ అతిపెద్ద, లాగుడుబండి వంటి వెండి శకటంలో పెద్దశిఖరం లాగా అమర్చుతారు. దానికి ఎనిమిది దిక్కుల్లో పులిహోరతో ఎనిమిది చిన్న శిఖరాలను ఏర్పాటు చేసి నివేదన చేస్తారు. పులిహోరతో పాటుగా, గురువారం నాడు మాత్రమే తయారు చేయబడే పెద్ద జిలేబీలు, మురుకులు (తేనేతోళీలు లేదా కారం జిలేబీ) వంటి వాటిని కూడా చక్కగా అమర్చి పూలతో అలంకరిస్తారు. 🌈 స్వామివారికి అన్నం ఎందుకు నివేదించాలి? 🌈 💫 సమస్త జీవకోటికి ప్రాణాధారం అన్నం. అన్నం పరబ్రహ్మ స్వరూపం. మన జీవనం సజావుగా సాగిపోవడానికి భగవంతుడు మనకు ప్రసాదిస్తూ వస్తున్న అన్నానికి కృతజ్ఞతగా, సమస్త జీవరాశులకు మున్ముందు కూడా ఏ లోటూ లేకుండా అన్నలభ్యత చేకూరాలని ప్రార్థిస్తూ జరిగే ఈ సేవ అత్యంత ప్రముఖమైన సేవల్లో ఒకటి. 💫‌ వీటితో పాటు ఇంకా అనేక నైవేద్యాలు సమర్పించి..., "ఓ స్వామీ! ఈ రోజు నువ్వు నిజనేత్రాలతో సమస్తమైన భక్తులందరినీ అనుగ్రహిస్తున్నావు. ఇదుగో స్వీకరించు నాయనా.." అంటూ స్వామివారికి నివేదిస్తారు. 💫 ఈ తిరుప్పావడ సేవ గాంచిన భక్తులకు, నివేదించిన పులిహోరలో ఎన్ని మెతుకు లున్నాయో, అన్ని సంవత్సరాల పాటు స్వర్గవాసం లభిస్తుందని పెద్దలు చెబుతారు. 🙏 నిజనేత్ర దర్శనం 🙏 "కంటి నఖిలాండతతి కర్తనధికుని గంటి -కంటి నఘములు వీడుకొంటి నిజమూర్తి గంటి...." 💫 అంటూ, అన్నమయ్య కీర్తించిన, మహా మహిమాన్వితమైన శ్రీవారి నిజనేత్ర శోభను దర్శించడం పూర్వ జన్మ సుకృతం. 💫 ప్రతి గురువారం జరిగే నిజనేత్ర దర్శనోత్సవం లో స్వామివారు సన్నటి నామాలతో, విప్పారిన నేత్రాలతో, ఆభరణాలు లేకుండా, కేవలం ధోవతి, పైపల్లెవాటుతో, మెడలో రెండు కంటెలతో, బుగ్గన పచ్చకర్పూరపు దిష్టిచుక్కతో, సొగసైన తలగుడ్డతో, నిరాడంబరంగా ఉంటారు. నల్లని మేనుతో మెరిసిపోతూ, ద్వాపరం నాటి ఆ నల్లనయ్యే కలియుగంలో ఈ శ్రీనివాసునిగా ఉద్భవించాడనే జగద్విదితమైన సత్యాన్ని దృఢపరుస్తారు. అందువల్లనే కొందరు నిజనేత్ర దర్శనాన్ని 'గోపాలుని దర్శనం" అని కూడా అంటారు. గోమాతతో అనుబంధం, గొల్లల సాన్నిహిత్యం, పాలు-పెరుగుల సేవనం, ఇవన్నీ గుర్తుకు తెచ్చుకుంటుంటే, ఆ నల్లనయ్యే ఈ చక్కనయ్య అనే నమ్మకం మరింత బలపడట్లేదూ? 💫 నిజనేత్ర దర్శనానికి సంబంధించి ఓ ఆసక్తి కరమైన అంశం స్థానికంగా వెలుగులో ఉంది. 💫 తిరుమలలో ఉన్నటువంటి సిబ్బంది, వ్యాపారులు అందరూ, గురువారం నాడు మరింత జాగ్రత్తగా, ఏ విధమైన పొరపాట్లు, తప్పిదాలు జరగకుండా జాగ్రత్త పడతారట. ఎందుకంటే, స్వామివారు సన్నటి నామాల కారణంగా వికసిత నేత్రాలతో ఉండడం వల్ల, ఏ తప్పు జరిగినా వెంటనే గమనిస్తారని వారి నమ్మకం. మిగతా రోజుల్లో అర్ధనిమీలిత నేత్రాలతో ఉన్నంత మాత్రాన ఆ సర్వాంతర్యామికి, సహస్రనేత్రుడికీ మనం చేసే తప్పొప్పులు కనబడటం లేదనుకోవడం కేవలం అజ్ఞానం! 🙏 పూలంగి సేవ 🙏 "పూలంగి సేవకే పూలెన్నో తెచ్చేము! మా భక్తి సీమలో పూమాల లల్లేము!" 💫‌ పూలంగి అంటే పువ్వుల అంగీ. అనగా పుష్పాలనే వస్త్రాలు గా ధరించడం. 💫 గురువారం నాడు జరిగే మరో సేవ పూలంగి సేవ. రాత్రి 8 గం. లకు జరిగే ఈ సేవ పూర్తిగా ఏకాంతం. జియ్యంగార్లు అందించే పూలమాలలను అర్చకులు శ్రీవారిమూర్తికి వస్త్ర రూపంగా, ఉత్తరీయ రూపంగా, ఆభరణ రూపంగా, కిరీటశంఖు-చక్రాల రూపంగా, మొత్తం పుష్పమయంగా, శోభాయమానంగా అలంకరిస్తారు. స్వామి వారు పూల అంగీని తొడిగినట్లుగా, కోటి రెట్ల సౌందర్యంతో, నవ మన్మథునిలా కను విందు చేస్తారు. 💫 వైష్ణవాలయాలను పుష్పమండపం, జ్ఞానమండపం, త్యాగమండపాలు గా వర్గీకరిస్తారు. తిరుమల పుష్పమండపమన్న మాట. ఈ క్షేత్రంలో పూచే పువ్వులన్నీ, పూర్వ జన్మల్లో మహా భక్తులు, సిద్ధపురుషులు, మునిపుంగవులే. వారి వారి పూర్వజన్మ పుణ్యఫలాల ననుసరించి వారు ఈ జన్మలో పూవులుగా పూచి స్వామి వారికి అలంకృతమవుతున్నారు. అందువల్లనే, తిరుమలలో పుష్పాలన్నీ స్వామికే చెందుతాయనీ, వేరెవ్వరూ పూలు అలంకరించు కోరాదనే సాంప్రదాయం అమల్లో ఉంది. 💫‌ సువాసనలు వెదజల్లే పుష్పాలతో అలంకరింప బడిన స్వామివారిని దర్శించుకుంటే, జన్మాంతర వాసనలన్నీ పోయి, గత జన్మల పాపాలన్నీ పటాపంచలవుతాయని భక్తుల నమ్మిక. 💫 గురువారం నాడు జరిగే వారపు సేవలైన - తిరుప్పావడ సేవ, నిజనేత్ర దర్శనం, పూలంగి సేవలు సమాప్తం.

<div class="separator" style="clear: both; text-align: center;"><a href="https://blogger.googleusercontent.com/img/b/R29vZ2xl/AVvXsEiZkOiFM6soLyqGCbd0c1lGugv2FFh8YFpho_0d9Igj8H-WuF3NQzhVd6xqr2XWky6JYfJ9TvZgjfvX4xVE-JveHv1-qT1PMkeP-NuerlzZvRH8yegXlHGvrpDplc7MLhtrboJgaF4S0q-y2Rg71lmyg8dc2ous5dLoWQh2QZNLU6Z4oglztCfR5jU/s2048/259239688_4287939194651459_6535214520869539528_n.jpg" imageanchor="1" style="margin-left: 1em; margin-right: 1em;"><img border="0" data-original-height="1152" data-original-width="2048" src="https://blogger.googleusercontent.com/img/b/R29vZ2xl/AVvXsEiZkOiFM6soLyqGCbd0c1lGugv2FFh8YFpho_0d9Igj8H-WuF3NQzhVd6xqr2XWky6JYfJ9TvZgjfvX4xVE-JveHv1-qT1PMkeP-NuerlzZvRH8yegXlHGvrpDplc7MLhtrboJgaF4S0q-y2Rg71lmyg8dc2ous5dLoWQh2QZNLU6Z4oglztCfR5jU/s16000/259239688_4287939194651459_6535214520869539528_n.jpg" /></a></div> <h1 style="text-align: left;">🙏 శ్రీవారి వారోత్సవాలు-3 🙏</h1> 🙏 శుక్రవారం అభిషేకం 🙏 "కంటి శుక్రవారము గడియ లేడింట -అంటి అలమేల్మంగ అండ నుండే స్వామిని!" 💫 అన్న కీర్తనలో, అన్నమయ్య, శుక్రవారాభిషేకం సందర్భంగా శ్రీవారికి జరిగే ఉపచర్యలన్నీ ముగ్ధమనోహరంగా వర్ణించాడు. ఆ వాగ్గేయకారుని వర్ణన ముందు, మనం చెప్పుకునే అభిషేక ముచ్చట్లన్నీ, చంద్రుని ముందు దీవిటీ లాగా వెల వెల బోతాయని తెలిసీ, స్వామివారి మీద భారం వేసి ఈ సాహసానికి పూనుకుంటున్నాం. 💫 శ్రీవేంకటేశుని మూలమూర్తికి ప్రతి శుక్రవారం ఉదయం 3:30 గం. ల నుండి 5 గం. ల మధ్య శుక్రవార అభిషేకం జరుగుతుంది. అభిషేక సమయంలో ఆభరణాది అలంకారాలు లేకుండా ఉన్న స్వామివారి మూర్తి యొక్క సొబగులు వర్ణించడం మహామహుల తరం కూడా కాదు. తీర్చిదిద్ది నట్లుండే పెదవులు, సంపెంగ వంటి ముక్కు, వికసించిన పుష్పంలా ఉండే ముఖారవిందాన్ని వీక్షిస్తూ భక్తజనులు మైమరచి పోతుంటారు. 🌈 అభిషేక సేవ పుట్టు పూర్వోత్తరాల్లోకి వెళ్తే ---- 🌈 💫 పల్లవరాణి "సామవై" భోగశ్రీనివాసుని వెండి ప్రతిమను బహూకరించినప్పటి కాలం, అనగా 614 వ సం., ముందు నుండీ, విశేష సందర్భాల్లో ఈ అభిషేకోత్సవం జరిగేది. తరువాతి కాలంలో ప్రతి రెండవ శుక్రవారం (పక్షానికో సారి) జరిగేది. అయితే, 11-12 శతాబ్దాల్లో భగవద్రామానుజుల వారు స్వామివారి వక్షఃస్థలంలో "బంగారు అలమేలు మంగ" ప్రతిమను అలంకరింప జేసిన శుక్లపక్ష ద్వాదశి ఉత్తరఫల్గుణీ నక్షత్ర శుక్రవారం నాటి నుండి, ప్రతీ శుక్రవారం ఈ అభిషేక సేవ నిరాఘాటంగా జరుగుతూ వస్తోంది. 💫 ప్రాతఃకాల ఆరాధన పూర్తి కాగానే, అర్చకులు తెర వేసి శుక్రవార అభిషేక నిమిత్తం, ఏకాంతంగా శ్రీవారికి సంకల్పం చేస్తారు. ఉపచారాలు సమర్పించి, అష్టోత్తరశత నామార్చన కూడా చేస్తారు. అభిషేకానికి ముందుగా శ్రీవారి ఊర్ధ్వపుండ్రాన్ని (తిరునామం) అర్ధభాగానికి తగ్గించి సూక్ష్మ ఊర్ధ్వపుండ్రంతో ఉంచుతారు. ఉత్తరీయాన్ని తొలగించి స్నాన కౌపీనాన్ని ధరింప జేస్తారు. 💫 ఆ సమయంలో పరిచారకులు శీవారి సన్నిధానంలో రెండు వెండి గంగాళాల గోక్షీరం, మరో రెండు గంగాళాల బంగారుబావి శుధ్ధోదకం సిద్ధం చేస్తారు. 💫 జియ్యంగార్లు అందించే క్షీరంతో నిండి ఉన్న శంఖుపాత్రలను అర్చక స్వాములు స్వీకరించి, పండితులు వేదపారాయణం జరుపుతుండగా, క్షీరాభిషేకం చేస్తారు. అప్పుడు, శ్రీవారి వరదహస్తం నుండి జాలువారే గోక్షీరాన్ని పాత్రల్లో స్వీకరించి తరువాత భక్తులకు తీర్థంగా ఇస్తారు. 💫 తరువాత చందనాన్ని శ్రీవారి దక్షిణహస్తం పై సమర్పించి, శ్రీవారి హస్తరేఖాంకితం చేసి అర్చకులు, జియ్యంగార్లు స్వీకరిస్తారు. పిమ్మట అర్చకులు పరిమళ పాత్రను తీసుకుని, ఆ పరిమళద్రవ్యాన్ని స్వామివారి కిరీటాన్నుండి ప్రారంభించి శరీరమంతా పూసి నలుగు పెడతారు. ఈ పరిమళ ద్రవ్యం పునుగు, జవ్వాది, కస్తూరి వంటి సుగంధద్రవ్యాల మిశ్రమం. "పచ్చకప్పురమె నూరి పసిడి గిన్నెల నించి తెచ్చి శిరసాదిగ దిగనలది అచ్చెరపడి చూడ అందరి కన్నులకింపై నిచ్చెమల్లెపూవు వలె నిటుతానుండే స్వామిని!!" 💫 అనే కీర్తనలో అన్నమయ్య శ్రీవారిని అభిషేక నిమిత్తం సిద్ధం చేసే ఘట్టాన్ని ముగ్ధమనోహరంగా వివరించారు. 💫 తరువాత, మహాభక్తుడు తిరుమలనంబి వంశీయులు తెచ్చి సిద్ధంగా ఉంచిన ఆకాశగంగ తీర్థంతో, తదుపరి శుధ్ధోదకంతో, స్నానాన్ని ప్రారంభించి స్వామివారి తిరుమేను పైనుండి పరమళ ద్రవ్యంతో కలిసి జాలు వారుతున్న అభిషేక ఉదకాన్ని అవయవాల వారిగా, ఆయుధాల వారిగా స్వీకరించి ఆ పవిత్ర తీర్థాన్ని తరువాత భక్తులకు ప్రసాదిస్తారు. 💫 ఆ తరువాత పసుపుతో శ్రీవారి వక్షఃస్థల మహాలక్ష్మికి కూడా అభిషేకం జరుగుతుంది. ఏ యుగం లోనో బ్రహ్మాది దేవతల కోరిక మేర, కలియుగ మానవుల కోసం వెలసిన శ్రీనివాసుని యథాతథమైన రూపాన్ని, వక్షస్థల లక్ష్మితో సహా దర్శించే మహద్భాగ్యం శుక్రవార అభిషేక సమయంలో మాత్రమే కలుగుతుంది. శ్రీవారి మెడలో ఉన్న బంగారు అలమేల్మంగకు కూడా తరువాత అభిషేకం జరుగుతుంది. 💫 తదనంతరం శ్రీవారికి 108 కలశాల శుద్ధ జలంతో అభిషేకం పూర్తి చేస్తారు. ఈ అభిషేక తీర్థాన్ని ప్రధాన అర్చకుడు పాత్రలలో సేకరించి, మొదట తన శిరస్సును సంప్రోక్షించుకుని, సన్నిధానంలో ఉన్న ఇతర అర్చకులు, ఏకాంగి, ఆచార్యపురుషులు, ఆలయ అధికారుల మీద "భూతో భవః" అంటూ ప్రోక్షణ చేస్తారు. 💫‌ తరువాత అర్చకులు తెరవేసి శ్రీవారికి ఉన్ శాత్ అనబడే 24 మూరల పొడవు గల సరిగంచు పట్టు ధోవతి ని ధరింపజేస్తారు. ఆలాగే 12 మూరల ఉత్తరీయాన్ని వల్లెవాటుగా వేస్తారు. వెంటనే శ్రీవారికి గోనవనీతం (వెన్న, పంచదార) నివేదన చేసి, ముఖవాసం (కస్తూరి తాంబూలం) సమర్పిస్తారు. తరువాత పచ్చకర్పూర హారతినిస్తూ, తెర తొలగిస్తారు. 💫 తరువాత, మళ్ళీ తెరవేసి ఏకాంతంగా ఊర్ధ్వపుండ్రం, వస్త్రాలంకార సేవలు కావించి భక్తుల సందర్శనార్థం తిరిగి తెర తీయడంతో, అభిషేక సేవాకార్యక్రమం పూర్తవుతుంది. అభిషేకానంతరం గడ్డం బొట్టు మాత్రం అలంకరించరు. 💫 శ్రీవారి శుక్రవార అభిషేక దర్శనంతో, భక్తుల జన్మ జన్మాంతర పాపాలన్నీ శుభ్రంగా కడిగి వేసినట్లు తొలగిపోవడమే కాకుండా, ఆరోగ్య-ఐశ్వర్య సంపదలు సమృద్ధిగా కలుగుతాయని ప్రతీతి. 💫‌అత్యంత దుర్లభమైన ఈ సేవలో పాల్గొనాలనే ప్రగాఢవాంఛ శ్రీనివాసుని ప్రతి భక్తునికీ ఉంటుంది. అయితే, శీవారి అనుగ్రహం పొందిన ఏ కొద్ది మందికో మాత్రమే ఈ భాగ్యం కలుగుతుంది. 💫 అకుంఠిత భక్తి విశ్వాసాలతో, అసాధ్యాలను సుసాధ్యం చేయవచ్చని ఎందరో భక్తలు నిరూపించారు. మనమూ ప్రయత్నిద్దాం! కృషితో నాస్తి దుర్భిక్షం! 🌈 నిజపాద దర్శనం 🌈 💫 ప్రతి శుక్రవారం అభిషేకానంతరం, అభిషేక సేవలో పాల్గొన్న భక్తులు స్వామివారిని దర్శించి వెళ్ళిన తరువాత నిజపాద దర్శనం అనే ఆర్జితసేవ ప్రారంభ మవుతుంది. ఈ సేవలో పాల్గొనే భక్తులు స్వామివారి పాదాలను ఎటువంటి ఆచ్ఛాదన లేకుండా చూడవచ్చు. మిగిలిన వేళల్లో ఆ పాదాలు బంగారు తొడుగులతో విరాజిల్లుతూ ఉంటాయి. 💫 మూలమూర్తిని శ్రద్ధగా గమనిస్తే, శ్రీవారు దక్షిణహస్తంతో తన పాదద్వయాన్ని సూచిస్తుంటారు. వామహస్తం కటి భాగాన, కుడివైపు తిరిగి నేలకు సమాంతరంగా ఉంటుంది. అంటే, భక్తులు తన పాదాల్ని శరణు వేడితే, వారిని తన వామహస్తంతో అక్కున చేర్చుకుంటానని సందేశమిస్తున్నారన్నమాట. అందువల్లనే, శ్రీవారి పాద దర్శనంతో పాపాలు పటాపంచలౌతాయని తరతరాల నమ్మిక. 🙏 శ్రీవారి పాద దర్శనం సర్వ పాప విమోచనం.🙏 బ్రహ్మ కడిగిన ఆ పాదాలు కనికరిస్తే కానిదే ముంటుంది? 🙏 🌈 వస్త్రాలంకారసేవ 🌈 💫 ఈ ఆర్జితసేవ కూడా ప్రతి శుక్రవారం అభిషేకానంతరం జరుగుతుంది. 💫‌ అర్చకులు ముందుగా భక్తులు సమర్పించిన నూతన వస్త్రాలను శ్రీవారికి ధరింపజేసి, వారిని ఆభరణాలతో అలంకరిస్తారు. ఇదంతా ఏకాంతంగా జరుగుతుంది. 💫 వస్త్రాలంకార మరియు అభిషేక సేవల్లో పాల్గొన్న భక్తులను నైవేద్యం తరువాత, నూతన వస్త్రధారుడైన వేంకటేశుని దర్శించటానికి అనుమతిస్తారు. 💫 శ్రీవారికి సడలింపు జేసిన వస్త్రాన్ని, విమాన ప్రదక్షిణ మార్గంలో ఉన్న సబేరా అనే గదిలో భద్రపరుస్తారు. స్వామి వారి 💫 అలంకరణకు కావలసిన ఇతర సామగ్రి, ఏకాంతసేవలో ఉపయోగించే వెండి మంచం, మొదలైనవన్నీ కూడా ఈ గది లోనే భద్ర పరుస్తారు. 💫 అత్యంత ప్రముఖులు శ్రీవారి దర్శనార్థం వచ్చినప్పుడు వారికి ఈ సడలింపు చేయబడిన వస్త్రాన్ని మేల్చాట్ వస్త్రంగా బహూకరిస్తారు. అందుకే ఈ సేవను మేల్చాట్ వస్త్రసేవ అని కూడా అంటారు. శ్రీవారి సేవలన్నింటిలో ఖరీదైన ఈ సేవ నిమిత్తం ఒక జంటకు ప్రస్తుతం ₹12,250 చెల్లించాలి. 💫 తిరునామంతో పాటుగా, శ్రీవారి గడ్డం కూడా కర్పూరంతో అలంకరింప బడి ఉండటం మనం చూసే ఉంటాం. అలాగే, శ్రీవారి మహాద్వారానికి కుడివైపుగా (మందిరంలోకి వెళ్తూంటే) అలంకరింప బడిన గడ్డపారను కూడా తరచూ ఆలయాన్ని సందర్శించేవారు గమనించే ఉంటారు. వీటన్నింటికీ సంబంధించి ఓ ఆసక్తికరమైన కథను, మరో మహా భక్తుడు భక్తశిఖామణి అనంతాళ్వార్ గురించి తెలుసుకునే ముందు, ప్రతి సోమవారం నాడు జరిగే విశేషపూజల గురించి తెలుసుకుందాం. 🌈 విశేషపూజ 🌈 💫 ఈ ఆర్జితసేవ, ప్రతి సోమవారం ఉదయం 6 గం. లకు సంపంగి ప్రదక్షిణం లోని కళ్యాణ మంటపంలో, ఉభయ నాంచారులతో కూడిన మలయప్ప స్వామి వారికి జరుప బడుతుంది. 💫 1991వ సం. లో ఈ సేవ ప్రవేశపెట్టబడింది. 💫 శ్రీ మలయప్పస్వామి కళ్యాణమంటపానికి వేంచేసిన తరువాత, వైఖానస ఆగమ శాస్తోక్తంగా హోమాలు నిర్వహించిన పిదప, స్వామివారికి స్నపన తిరుమంజనం నిర్వహిస్తారు. తదనంతరం, భక్తులకు ప్రసాదాలు అందజేస్తారు. ✅ శనివారం, ఆదివారం ప్రత్యేక సేవలు ఏమీ ఉండవు.

Social Icons

Pages

ॐ Welcome to TirumalaHills - Dharmo Rakshati Rakshita - Govinda Govinda Govinda ॐ

Ads

Main Menu